sang-dil hai asar us pe hoga nahin qissa-e-gham sunane se kya faeda

sang-dil hai asar us pe hogā nahīñ qissa-e-ġham sunāne se kyā fā.eda

kam to hotī nahīñ sozish-e-zindagī āñsuoñ meñ nahāne se kyā fā.eda

raaz rakhte ho kyoñ saaf farmā.iye dil kī bāteñ chhupāne se kyā fā.eda

aas de de ke māyūs karte ho kyoñ yuuñ kisī ko satāne se kyā fā.eda

apnī tishna-labī kī shikāyat nahīñ ye to sāqī-garī kī bhī tauhīn hai

mai-kashī kā taqāzā samjhiye zarā qatra-qatra chakhāne se kyā fā.eda

ḳhauf-e-sayyād hai bijliyoñ kā hai Dar nā-muvāfiq havā hai fazā pur-ḳhatar

jab muḳhālif hai itne zamīñ āsmāñ phir nasheman banāne se kyā fā.eda

āmad-e-fasl-e-gul ho mubārak tumheñ ahl-e-gulshan magar ye to farmā.iye

jo kisī ke gale kī na zīnat bane aisī kaliyāñ khilāne se kyā fā.eda

chāñdnī kī tarah vajh-e-farhat bane husn se kuchh ziyā-e-mohabbat mile

barq ban kar jalā de jo duniyā mirī aisā jalva dikhāne se kyā fā.eda

raaz is meñ nahīñ koī is ke sivā maiñ jo ḳhāmosh huuñ 'raunaq'-e-be-navā

jis se fariyād hai vo to suntā nahīñ phir jahāñ ko sunāne se kyā fā.eda

sang-dil hai asar us pe hoga nahin qissa-e-gham sunane se kya faeda

kam to hoti nahin sozish-e-zindagi aansuon mein nahane se kya faeda

raaz rakhte ho kyon saf farmaiye dil ki baaten chhupane se kya faeda

aas de de ke mayus karte ho kyon yun kisi ko satane se kya faeda

apni tishna-labi ki shikayat nahin ye to saqi-gari ki bhi tauhin hai

mai-kashi ka taqaza samjhiye zara qatra-qatra chakhane se kya faeda

KHauf-e-sayyaad hai bijliyon ka hai Dar na-muwafiq hawa hai faza pur-KHatar

jab muKHalif hai itne zamin aasman phir nasheman banane se kya faeda

aamad-e-fasl-e-gul ho mubarak tumhein ahl-e-gulshan magar ye to farmaiye

jo kisi ke gale ki na zinat bane aisi kaliyan khilane se kya faeda

chandni ki tarah wajh-e-farhat bane husn se kuchh ziya-e-mohabbat mile

barq ban kar jala de jo duniya meri aisa jalwa dikhane se kya faeda

raaz is mein nahin koi is ke siwa main jo KHamosh hun 'raunaq'-e-be-nawa

jis se fariyaad hai wo to sunta nahin phir jahan ko sunane se kya faeda