sar-e-bazm-e-talab raqs-e-sharar hone se Darti hun

sar-e-bazm-e-talab raqs-e-sharar hone se Dartī huuñ

ki maiñ ḳhud par mohabbat kī nazar hone se Dartī huuñ

bachānā chāhtī huuñ us ko sūraj kī tamāzat se

magar maiñ us ke raste kā shajar hone se Dartī huuñ

kabhī us ke ḳhayāloñ meñ nahīñ jaatī thī dariyā par

aur ab ye vaqt aayā hai ki ghar hone se Dartī huuñ

agar ye sach hai ḳhushbū aur mohabbat chhup nahīñ sakte

to kyuuñ apnī mohabbat kī ḳhabar hone se Dartī huuñ

maiñ apnī zaat meñ bhīge paroñ kā bojh huuñ shāyad

kisī be-bāl-o-par ke bāl-o-par hone se Dartī huuñ

mujhe dushman kā bhī dil toḌnā achchhā nahīñ lagtā

kisī kī bad-duāoñ kā asar hone se Dartī huuñ

bhalā tashbīh se rutba mirā kyuuñ kam kare koī

'qamar' huuñ is liye rashk-e-qamar hone se Dartī huuñ

sar-e-bazm-e-talab raqs-e-sharar hone se Darti hun

ki main KHud par mohabbat ki nazar hone se Darti hun

bachana chahti hun us ko suraj ki tamazat se

magar main us ke raste ka shajar hone se Darti hun

kabhi us ke KHayalon mein nahin jati thi dariya par

aur ab ye waqt aaya hai ki ghar hone se Darti hun

agar ye sach hai KHushbu aur mohabbat chhup nahin sakte

to kyun apni mohabbat ki KHabar hone se Darti hun

main apni zat mein bhige paron ka bojh hun shayad

kisi be-baal-o-par ke baal-o-par hone se Darti hun

mujhe dushman ka bhi dil toDna achchha nahin lagta

kisi ki bad-duaon ka asar hone se Darti hun

bhala tashbih se rutba mera kyun kam kare koi

'qamar' hun is liye rashk-e-qamar hone se Darti hun