sar-e-dar aur kaun aata jo diwane nahin aate

sar-e-dār aur kaun aatā jo dīvāne nahīñ aate

ye vo manzil hai jis manzil meñ farzāne nahīñ aate

surāhī bhī hai baada bhī ghaTā.eñ bhī haiñ saaqī bhī

har ik shai hai magar gardish meñ paimāne nahīñ aate

jahān-e-zīst kī tāmīr-e-nau meñ jo muāvin hoñ

kareñ kyā apne hoñToñ tak vo afsāne nahīñ aate

manā leñ ḳhuub jashn-e-aish arbāb-e-ḳhirad hamdam

abhī kuchh der tak mahfil meñ dīvāne nahīñ aate

chalā huuñ tāza-dam le kar bahāreñ jānib-e-sahrā

tasavvur meñ bhī ab to dost vīrāne nahīñ aate

na jaane sard ho kar rah ga.ī kyoñ garmi-e-mahfil

ye kyoñ āḳhir huzūr-e-sham.a parvāne nahīñ aate

kashākash hī rahegī sāġhar-o-mīnā-o-bāda meñ

qadam jab tak hamāre 'fauq' mai-ḳhāne nahīñ aate

sar-e-dar aur kaun aata jo diwane nahin aate

ye wo manzil hai jis manzil mein farzane nahin aate

surahi bhi hai baada bhi ghaTaen bhi hain saqi bhi

har ek shai hai magar gardish mein paimane nahin aate

jahan-e-zist ki tamir-e-nau mein jo muawin hon

karen kya apne honTon tak wo afsane nahin aate

mana len KHub jashn-e-aish arbab-e-KHirad hamdam

abhi kuchh der tak mahfil mein diwane nahin aate

chala hun taza-dam le kar bahaaren jaanib-e-sahra

tasawwur mein bhi ab to dost virane nahin aate

na jaane sard ho kar rah gai kyon garmi-e-mahfil

ye kyon aaKHir huzur-e-shama parwane nahin aate

kashakash hi rahegi saghar-o-mina-o-baada mein

qadam jab tak hamare 'fauq' mai-KHane nahin aate