sar-e-manzar na mile to pas-e-manzar dekhun

sar-e-manzar na mile to pas-e-manzar dekhūñ

koī sūrat ho magar maiñ use aksar dekhūñ

apne afkār ko mailā to nahīñ kar saktī

phuul barseñ ki baraste hue patthar dekhūñ

maiñ bhī ik mauj huuñ merā bhī muqaddar hai safar

kaise sāhil pe khaḌe rah ke samundar dekhūñ

koī guzrā huā lamha to palaTnā hī nahīñ

ye kahāñ taab ki ā.īna mukarrar dekhūñ

sunte haiñ giit banā kartī haiñ kirneñ aksar

chāñd ko aaj to āñgan meñ nikal kar dekhūñ

vaqt ke paañv meñ zanjīr-e-duā bhī Daalo

jab sar-e-shāḳh-e-chaman koī gul-e-tar dekhūñ

sach kī mere liye kyoñ aur na qīmat baḌh jaa.e

jab maiñ laTkī huī talvār bhī sar par dekhūñ

mere fan kā hai yahī mujh se taqāzā 'ra.anā'

jo mirī zaat meñ pinhāñ hai vo bāhar dekhūñ

sar-e-manzar na mile to pas-e-manzar dekhun

koi surat ho magar main use aksar dekhun

apne afkar ko maila to nahin kar sakti

phul barsen ki baraste hue patthar dekhun

main bhi ek mauj hun mera bhi muqaddar hai safar

kaise sahil pe khaDe rah ke samundar dekhun

koi guzra hua lamha to palaTna hi nahin

ye kahan tab ki aaina mukarrar dekhun

sunte hain git bana karti hain kirnen aksar

chand ko aaj to aangan mein nikal kar dekhun

waqt ke panw mein zanjir-e-dua bhi Dalo

jab sar-e-shaKH-e-chaman koi gul-e-tar dekhun

sach ki mere liye kyon aur na qimat baDh jae

jab main laTki hui talwar bhi sar par dekhun

mere fan ka hai yahi mujh se taqaza 'rana'

jo meri zat mein pinhan hai wo bahar dekhun