sar-e-tufan-e-gham aksar sahaara DhunD lete hain

sar-e-tūfān-e-ġham aksar sahārā DhūñD lete haiñ

udāsī ke samundar meñ kināra DhūñD lete haiñ

kabhī to sāmne kī baat bhī ham par nahīñ khultī

kabhī tah-dāriyoñ meñ gum ishāra DhūñD lete haiñ

tabī.at rañg meñ aa.e to ham chashm-e-tasavvur se

kisī be-jān manzar meñ nazāra DhūñDh lete haiñ

badal Daale haiñ kitne ghar ḳhushī ke vāste ham ne

magar ye ġham hamesha ghar hamārā DhūñDh lete haiñ

zamīñ jo mehrbāñ hotī nahīñ to ab yahī hal hai

falak par apnī qismat kā sitārā DhūñD lete haiñ

hamārī nā-umīdī aur tumhārī ārzūoñ kā

mudāvā ek hai mil kar ḳhudārā DhūñD lete haiñ

gurezāñ hone lagtī hai kabhī jab shā.irī ham se

bahāna us se milne kā dobāra DhūñD lete haiñ

sar-e-tufan-e-gham aksar sahaara DhunD lete hain

udasi ke samundar mein kinara DhunD lete hain

kabhi to samne ki baat bhi hum par nahin khulti

kabhi tah-dariyon mein gum ishaara DhunD lete hain

tabiat rang mein aae to hum chashm-e-tasawwur se

kisi be-jaan manzar mein nazara DhunDh lete hain

badal Dale hain kitne ghar KHushi ke waste hum ne

magar ye gham hamesha ghar hamara DhunDh lete hain

zamin jo mehrban hoti nahin to ab yahi hal hai

falak par apni qismat ka sitara DhunD lete hain

hamari na-umidi aur tumhaari aarzuon ka

mudawa ek hai mil kar KHudara DhunD lete hain

gurezan hone lagti hai kabhi jab shairi hum se

bahana us se milne ka dobara DhunD lete hain