sar ko nausha ke mere shah ne bandha sehra

sar ko nausha ke mire shaah ne bāñdhā sehrā

sūra-e-nūr kā dikhlātā hai jalva sehrā

riish yāqūb ne rakkhī hai ruḳh-e-yūsuf par

chashm-e-bad-dūr ki hai zulf-e-zuleḳhā sehrā

bāġh-e-ulfat se hasīnoñ ne jo kaliyāñ biinī

us parī ke liye pariyoñ ne banāyā sehrā

jadvaleñ sone kī yāqūt raqam ne khīñchī

yā hai mus.haf pe sar-e-lauh mutallā sehrā

jalva-e-tūr kā muusī ko gumāñ ho jaatā

mere nausha jo zarā dekhte sar kā sahrā

sho.ala-e-husn jo un kā na chhupā sehre meñ

ijz se aap ko qadmoñ pe girāyā sehrā

pote paḌpotoñ ke tum bāñdhiyo sar ko sehre

jaisā baabā ne tumhāre tumheñ bāñdhā sehrā

hub kā ta.avīz bane phuul har ik sehre kā

vasl-e-yār us ko ho jis ne tirā dekhā sehrā

ūftāda bhī hai ye aur baḌā shoḳh bhī hai

gul-e-ruḳhsār kā le letā hai bosa sehrā

sehrā jo bāñdhte haiñ hind meñ naushāhoñ ko

chashm-e-bad ke liye shāyad hai ye niklā sehrā

panja-e-mehr se zohrā ne balā.eñ le liiñ

jab 'nasīm'-e-chaman-e-shauq ne likkhā sehrā

sar ko nausha ke mere shah ne bandha sehra

sura-e-nur ka dikhlata hai jalwa sehra

rish yaqub ne rakkhi hai ruKH-e-yusuf par

chashm-e-bad-dur ki hai zulf-e-zuleKHa sehra

bagh-e-ulfat se hasinon ne jo kaliyan bini

us pari ke liye pariyon ne banaya sehra

jadwalen sone ki yaqut raqam ne khinchi

ya hai mushaf pe sar-e-lauh mutalla sehra

jalwa-e-tur ka musi ko guman ho jata

mere nausha jo zara dekhte sar ka sahra

shoala-e-husn jo un ka na chhupa sehre mein

ijz se aap ko qadmon pe giraya sehra

pote paDpoton ke tum bandhiyo sar ko sehre

jaisa baba ne tumhaare tumhein bandha sehra

hub ka tawiz bane phul har ek sehre ka

wasl-e-yar us ko ho jis ne tera dekha sehra

uftada bhi hai ye aur baDa shoKH bhi hai

gul-e-ruKHsar ka le leta hai bosa sehra

sehra jo bandhte hain hind mein naushahon ko

chashm-e-bad ke liye shayad hai ye nikla sehra

panja-e-mehr se zohra ne balaen le lin

jab 'nasim'-e-chaman-e-shauq ne likkha sehra