sar-nigun dil ki tarah dast-e-dua ho bhi chuke

sar-nigūñ dil kī tarah dast-e-duā ho bhī chuke

silsile jin ke judā the vo judā ho bhī chuke

dasht meñ aayā nahīñ nāqa-e-mahmil-bar-dosh

naqsh kuchh sūrat-e-naqsh-e-kaf-e-pā ho bhī chuke

naḳhl-e-ummīd rahā phir bhī numū se mahrūm

jab ki mausam ka.ī āġhosh-kushā ho bhī chuke

ek be-nām sī hasrat hai badan meñ baaqī

jis qadar qarz the shab ke vo adā ho bhī chuke

ḳhvāhish-e-uqda-kushā.ī pe nadāmat kaisī

rasm-e-nāḳhun se ḳhafā band-e-qabā ho bhī chuke

ab to bas ek tasalsul hai ta.alluq kā darāz

imtihāñ ho bhī chukā va.ade vafā ho bhī chuke

kab tak ai bād-e-sabā tujh se tavaqqo.a rakkhūñ

dil tamannā kā shajar hai to harā ho bhī chuke

maiñ to ik guuñj meñ zinda huuñ sar-e-bazm 'razī'

jin ko honā thā yahāñ naġhma-sarā ho bhī chuke

sar-nigun dil ki tarah dast-e-dua ho bhi chuke

silsile jin ke juda the wo juda ho bhi chuke

dasht mein aaya nahin naqa-e-mahmil-bar-dosh

naqsh kuchh surat-e-naqsh-e-kaf-e-pa ho bhi chuke

naKHl-e-ummid raha phir bhi numu se mahrum

jab ki mausam kai aaghosh-kusha ho bhi chuke

ek be-nam si hasrat hai badan mein baqi

jis qadar qarz the shab ke wo ada ho bhi chuke

KHwahish-e-uqda-kushai pe nadamat kaisi

rasm-e-naKHun se KHafa band-e-qaba ho bhi chuke

ab to bas ek tasalsul hai talluq ka daraaz

imtihan ho bhi chuka wade wafa ho bhi chuke

kab tak ai baad-e-saba tujh se tawaqqoa rakkhun

dil tamanna ka shajar hai to hara ho bhi chuke

main to ek gunj mein zinda hun sar-e-bazm 'razi'

jin ko hona tha yahan naghma-sara ho bhi chuke