sar-nigun sara jahan hai mamta ke samne

sar-nigūñ saarā jahāñ hai māmtā ke sāmne

bad-duā meñ hai duā us kī duā ke sāmne

maiñ tumhāre sāmne is vāste ḳhāmosh huuñ

faisla ho jā.egā ik din ḳhudā ke sāmne

izzat-o-shohrat mohabbat se ye dāman bhar gayā

shukr ke sajde karūñ rab kī atā ke sāmne

kar chukī hai ab jahāñ-ārā 'tabassum' hausla

rakh diyā hai ab diyā lā kar havā ke sāmne

kis qadar zālim hai ye duniyā ta.ajjub hai mujhe

bevafā kahtī hai mujh ko bevafā ke sāmne

aisā lagtā hai ki mahfil muskurāne lag ga.ī

aa ke jab vo baiThtā hai muskurā ke sāmne

ek maiñ huuñ aur ik dhak dhak dhaḌaktā dil mirā

ġhair ko taktā hai vo mujh ko biThā ke sāmne

yaar nazroñ se pare thā aa.ina bhī thā pare

saj-sañvar ke aa ga.ī jān-e-adā ke sāmne

kyā kahūñ kaise kahūñ kis se kahūñ aur kyuuñ kahūñ

sochtī huuñ chup rahūñ us nāḳhudā ke sāmne

aaj nazroñ se milīñ nazreñ to vo kahne lagā

phir se kyuuñ tum aa ga.ī ho muskurā ke sāmne

pahle us ne kyā kahā phir kyā kahā phir kyā kahā

merā tū ne ḳhat rakhā jab dilrubā ke sāmne

in añdheroñ se na ghabrā tū ki tere vāste

maiñ ne apnā rakh diyā hai dil jalā ke sāmne

lafz bārish kī tarah mujh par baraste jaa.eñ phir

sher jab kahne lagūñ us ko biThā ke sāmne

jab talak duniyā meñ kāġhaz aur qalam maujūd haiñ

bā-vafā likhtī rahūñgī bevafā ke sāmne

kyuuñ tirā pyārā 'tabassum' aaj phīkā paḌ gayā

haar kyuuñ maanī hai tū ne phir jafā ke sāmne

sar-nigun sara jahan hai mamta ke samne

bad-dua mein hai dua us ki dua ke samne

main tumhaare samne is waste KHamosh hun

faisla ho jaega ek din KHuda ke samne

izzat-o-shohrat mohabbat se ye daman bhar gaya

shukr ke sajde karun rab ki ata ke samne

kar chuki hai ab jahan-ara 'tabassum' hausla

rakh diya hai ab diya la kar hawa ke samne

kis qadar zalim hai ye duniya tajjub hai mujhe

bewafa kahti hai mujh ko bewafa ke samne

aisa lagta hai ki mahfil muskurane lag gai

aa ke jab wo baiThta hai muskura ke samne

ek main hun aur ek dhak dhak dhaDakta dil mera

ghair ko takta hai wo mujh ko biTha ke samne

yar nazron se pare tha aaina bhi tha pare

saj-sanwar ke aa gai jaan-e-ada ke samne

kya kahun kaise kahun kis se kahun aur kyun kahun

sochti hun chup rahun us naKHuda ke samne

aaj nazron se milin nazren to wo kahne laga

phir se kyun tum aa gai ho muskura ke samne

pahle us ne kya kaha phir kya kaha phir kya kaha

mera tu ne KHat rakha jab dilruba ke samne

in andheron se na ghabra tu ki tere waste

main ne apna rakh diya hai dil jala ke samne

lafz barish ki tarah mujh par baraste jaen phir

sher jab kahne lagun us ko biTha ke samne

jab talak duniya mein kaghaz aur qalam maujud hain

ba-wafa likhti rahungi bewafa ke samne

kyun tera pyara 'tabassum' aaj phika paD gaya

haar kyun mani hai tu ne phir jafa ke samne