sar pe harf aata hai dastar pe harf aata hai

sar pe harf aatā hai dastār pe harf aatā hai

tañg hoñ log to sardār pe harf aatā hai

vaise to maiñ bhī bhulā saktā huuñ tujh ko lekin

ishq huuñ so mire kirdār pe harf aatā hai

ghar kī jab baat nikal jaatī hai ghar se bāhar

dar pe harf aatā hai dīvār pe harf aatā hai

kitnā be-bas huuñ ki ḳhāmosh mujhe rahnā hai

boltā huuñ to mire yaar pe harf aatā hai

chup jo rahtā huuñ to huuñ barsar-e-mahfil mujrim

arz kartā huuñ to sarkār pe harf aatā hai

shikva-e-jaur-o-jafā lab pe agar aa jaa.e

dil pe harf aatā hai dildār pe harf aatā hai

sar pe harf aata hai dastar pe harf aata hai

tang hon log to sardar pe harf aata hai

waise to main bhi bhula sakta hun tujh ko lekin

ishq hun so mere kirdar pe harf aata hai

ghar ki jab baat nikal jati hai ghar se bahar

dar pe harf aata hai diwar pe harf aata hai

kitna be-bas hun ki KHamosh mujhe rahna hai

bolta hun to mere yar pe harf aata hai

chup jo rahta hun to hun barsar-e-mahfil mujrim

arz karta hun to sarkar pe harf aata hai

shikwa-e-jaur-o-jafa lab pe agar aa jae

dil pe harf aata hai dildar pe harf aata hai