sar se junun-e-ishq ka sauda nikaliye

sar se junūn-e-ishq kā saudā nikāliye

yā apne dil se ḳhvāhish-e-duniyā nikāliye

yā haath bāñdh lījiye duniyā ke sāmne

yā haath khol kar yad-e-baizā nikāliye

yā mom ban ke ḳhud ko havādis meñ Dhāliye

yā sañg se sharār-e-tamannā nikāliye

yā pyaas apnī abr-e-karam se bujhā.iye

yā ḳhud pahāḌ kaaT ke dariyā nikāliye

ye kyā ki saarī umr ba-tarz-e-janābe-shaiḳh

pagḌī se apnī ilm kā turra nikāliye

tahqīq meñ to baal kī bhī khaal khīñchiye

taḳhlīq meñ pahāḌ se chuhā nikāliye

tāqat ke aage garba-e-miskīñ kī myā.un myā.un

nā-tāqatī ko dekh ke panja nikāliye

nāhaq kī vaah vaah meñ taqrīr-e-dil-pazīr

haq ke ḳhilāf aql kā shosha nikāliye

bebāk hai jo 'bāqar'-e-āshufta-sar bahut

kuchh us kī sarzanish kā bahāna nikāliye

sar se junun-e-ishq ka sauda nikaliye

ya apne dil se KHwahish-e-duniya nikaliye

ya hath bandh lijiye duniya ke samne

ya hath khol kar yad-e-baiza nikaliye

ya mom ban ke KHud ko hawadis mein Dhaaliye

ya sang se sharar-e-tamanna nikaliye

ya pyas apni abr-e-karam se bujhaiye

ya KHud pahaD kaT ke dariya nikaliye

ye kya ki sari umr ba-tarz-e-janabe-shaiKH

pagDi se apni ilm ka turra nikaliye

tahqiq mein to baal ki bhi khaal khinchiye

taKHliq mein pahaD se chuha nikaliye

taqat ke aage garba-e-miskin ki myaun myaun

na-taqati ko dekh ke panja nikaliye

nahaq ki wah wah mein taqrir-e-dil-pazir

haq ke KHilaf aql ka shosha nikaliye

bebak hai jo 'baqar'-e-ashufta-sar bahut

kuchh us ki sarzanish ka bahana nikaliye