sarab-e-sahra mein pani talash karta hai

sarāb-e-sahrā meñ paanī talāsh kartā hai

vo daldaloñ meñ ravānī talāsh kartā hai

har ek zarre se pahchān rab kī hotī hai

vo phir bhī us kī nishānī talāsh kartā hai

use yaqīn hai apne ḳhudā kī rahmat par

jo tapte sahrā meñ paanī talāsh kartā hai

kitāb-e-dil ko samajhnā muhāl hai us kā

vo chehrā chehrā ma.ānī talāsh kartā hai

na.e ġhamoñ ke añdheroñ se jañg hai us kī

bujhe diyoñ kī javānī talāsh kartā hai

hoñ raaja rānī, hoñ lashkar, hoñ hāthī ghoḌe sab

vo har kahānī meñ naanī talāsh kartā hai

bahut sharīf hai to 'chāñd' jā ke sansad meñ

'kabir-das' kī vaanī talāsh kartā hai

sarab-e-sahra mein pani talash karta hai

wo daldalon mein rawani talash karta hai

har ek zarre se pahchan rab ki hoti hai

wo phir bhi us ki nishani talash karta hai

use yaqin hai apne KHuda ki rahmat par

jo tapte sahra mein pani talash karta hai

kitab-e-dil ko samajhna muhaal hai us ka

wo chehra chehra maani talash karta hai

nae ghamon ke andheron se jang hai us ki

bujhe diyon ki jawani talash karta hai

hon raja rani, hon lashkar, hon hathi ghoDe sab

wo har kahani mein nani talash karta hai

bahut sharif hai to 'chand' ja ke sansad mein

'kabir-das' ki wani talash karta hai