sard mausam ki KHata thi na zamane ki thi

sard mausam kī ḳhatā thī na zamāne kī thī

sham.a ko jis ne bujhāyā vo havā merī thī

imtihāñ roz liyā kartā hai merā ab vo

āzmāne kī kabhī jis se guzārish kī thī

kar chukā thā maiñ samundar se kinārā kab kā

jis jagah Duubā thā maiñ kahte haiñ sāhil kī thī

hijr-o-qurbat ke bane itne fasāne kaise

chāñdnī chhat pe mirī itnī kahāñ bikhrī thī

kyuuñ tapish mujh meñ hai kyuuñ jism siyah hotā hai

rahguzar meñ to mire dhuup kahāñ utrī thī

ab koī ḳhvāb na āñkhoñ meñ tasavvur hai 'bashar'

varna āñkhoñ meñ mirī niiñd kahāñ rahtī thī

sard mausam ki KHata thi na zamane ki thi

shama ko jis ne bujhaya wo hawa meri thi

imtihan roz liya karta hai mera ab wo

aazmane ki kabhi jis se guzarish ki thi

kar chuka tha main samundar se kinara kab ka

jis jagah Duba tha main kahte hain sahil ki thi

hijr-o-qurbat ke bane itne fasane kaise

chandni chhat pe meri itni kahan bikhri thi

kyun tapish mujh mein hai kyun jism siyah hota hai

rahguzar mein to mere dhup kahan utri thi

ab koi KHwab na aankhon mein tasawwur hai 'bashar'

warna aankhon mein meri nind kahan rahti thi