sard-mehri se teri dil jo tapan rakhte hain

sard-mehrī se tirī dil jo tapāñ rakhte haiñ

hama-tan barf haiñ aahoñ meñ dhuāñ rakhte haiñ

sail-e-ġham aañkh ke parde meñ nihāñ rakhte haiñ

nā-tavāñ bhī tire kyā tāb-o-tavāñ rakhte haiñ

farsh-e-rah kis ke liye ham dil-o-jāñ rakhte haiñ

ḳhūb-rū paañv zamīñ par hī kahāñ rakhte haiñ

baat meñ baat usī kī hai suno tum jis kī

yuuñ to kahne ko sabhī muñh meñ zabāñ rakhte haiñ

jab se dushvār huā saañs kā aanā jaanā

ham nigāhoñ meñ jahān-e-guzarāñ rakhte haiñ

kis se be-dardī-e-ahbāb kā shikva kiije

naam be-tābī-e-dil kā ḳhafaqāñ rakhte haiñ

aañkh kholī hai to sayyād ke ghar kholī hai

ham qafas par hī nasheman kā gumāñ rakhte haiñ

phuul bhī muñh se jhaḌeñ baat bhī kāñTe kī rahe

ye adā aur suḳhan-sāz kahāñ rakhte haiñ

log rote bhī haiñ turbat meñ luTā kar ai 'ashk'

aur siine pe bhī ik sañg-e-girāñ rakhte haiñ

sard-mehri se teri dil jo tapan rakhte hain

hama-tan barf hain aahon mein dhuan rakhte hain

sail-e-gham aankh ke parde mein nihan rakhte hain

na-tawan bhi tere kya tab-o-tawan rakhte hain

farsh-e-rah kis ke liye hum dil-o-jaan rakhte hain

KHub-ru panw zamin par hi kahan rakhte hain

baat mein baat usi ki hai suno tum jis ki

yun to kahne ko sabhi munh mein zaban rakhte hain

jab se dushwar hua sans ka aana jaana

hum nigahon mein jahan-e-guzaran rakhte hain

kis se be-dardi-e-ahbab ka shikwa kije

nam be-tabi-e-dil ka KHafaqan rakhte hain

aankh kholi hai to sayyaad ke ghar kholi hai

hum qafas par hi nasheman ka guman rakhte hain

phul bhi munh se jhaDen baat bhi kanTe ki rahe

ye ada aur suKHan-saz kahan rakhte hain

log rote bhi hain turbat mein luTa kar ai 'ashk'

aur sine pe bhi ek sang-e-giran rakhte hain