sard rahon mein bhaTakti hui shamon ki tarah

sard rāhoñ meñ bhaTaktī huī shāmoñ kī tarah

maiñ tire saath chalī aa.ī huuñ rastoñ kī tarah

bas yahī dekh ke tajdīd-e-mohabbat kar lī

ro paḌā thā vo mire sāmne bachchoñ kī tarah

ghar udāsī ne paḌāv hai kiyā muddat se

ḳhvāb kamroñ meñ sajā rakkhe haiñ katboñ kī tarah

bāġh-e-hijrāñ kī bahāroñ ke bhī sub.hān-allāh

zaḳhm phūloñ kī tarah phuul haiñ zaḳhmoñ kī tarah

likh rahī huuñ tire māthe pe koī 'mīr' kā sher

paḌh rahī huuñ tirī āñkhoñ ko sahīfoñ kī tarah

vo mujhe chhoḌ gayā hijr musalle par raat

maiñ adā kartī rahī jis ko namāzoñ kī tarah

maut se rishta mirā maañ kī tarah hai 'sādī'

zindagī lagtī hai mujh ko sagī bahnoñ kī tarah

sard rahon mein bhaTakti hui shamon ki tarah

main tere sath chali aai hun raston ki tarah

bas yahi dekh ke tajdid-e-mohabbat kar li

ro paDa tha wo mere samne bachchon ki tarah

ghar udasi ne paDaw hai kiya muddat se

KHwab kamron mein saja rakkhe hain katbon ki tarah

bagh-e-hijran ki bahaaron ke bhi subhan-allah

zaKHm phulon ki tarah phul hain zaKHmon ki tarah

likh rahi hun tere mathe pe koi 'mir' ka sher

paDh rahi hun teri aankhon ko sahifon ki tarah

wo mujhe chhoD gaya hijr musalle par raat

main ada karti rahi jis ko namazon ki tarah

maut se rishta mera man ki tarah hai 'sadi'

zindagi lagti hai mujh ko sagi bahnon ki tarah