sarf-e-gham humne naujawani ki

sarf-e-ġham ham ne naujavānī kī

vaah kyā ḳhuub zindagānī kī

apnī biitī agar maiñ tujh se kahūñ

baat nibḌe na is kahānī kī

tere dāġhoñ kī ai ġham-e-ulfat

ḳhuub ham ne bhī bāġhbānī kī

juuñ nigah dil gayā hai āñkhoñ kī raah

garche ham ne nigāhbānī kī

kis ke haañ tum karam nahīñ karte

kabhū īdhar na mehrbānī kī

apne nazdīk dard-e-dil maiñ kahā

tere nazdīk qissa-ḳhvānī kī

harza-goī se mujh ko dī hai najāt

haigī minnat ye be-zabānī kī

nahīñ tāqat ki dam nikāl sakūñ

ab ye naubat hai nā-tavānī kī

'asar' is haal pe bhī jiitā hai

kyā kahūñ us kī saḳht-jānī kī

sarf-e-gham hum ne naujawani ki

wah kya KHub zindagani ki

apni biti agar main tujh se kahun

baat nibDe na is kahani ki

tere daghon ki ai gham-e-ulfat

KHub hum ne bhi baghbani ki

jun nigah dil gaya hai aankhon ki rah

garche hum ne nigahbani ki

kis ke han tum karam nahin karte

kabhu idhar na mehrbani ki

apne nazdik dard-e-dil main kaha

tere nazdik qissa-KHwani ki

harza-goi se mujh ko di hai najat

haigi minnat ye be-zabani ki

nahin taqat ki dam nikal sakun

ab ye naubat hai na-tawani ki

'asar' is haal pe bhi jita hai

kya kahun us ki saKHt-jaani ki