sargarm-e-safar to hun lekin manzil ka nishan malum nahin

sargarm-e-safar to huuñ lekin manzil kā nishāñ ma.alūm nahīñ

uThne ko to uTThe haiñ ye qadam jaanā hai kahāñ ma.alūm nahīñ

shādābi-e-gulshan kā manzar hai zehn meñ to mahfūz magar

kab shāḳh jalī kab phuul luTe kab aa.ī ḳhizāñ ma.alūm nahīñ

kaḌkan bhī fazā meñ jaarī hai kauñde bhī lapakte jaate haiñ

lahrā ke giregī kis kis par ye barq-e-tapāñ ma.alūm nahīñ

ham dasht-nashīñ haiñ gulshan kī rangīn fazā.eñ kyā jāneñ

kāñToñ kī to bastī dekhī hai phūloñ kā jahāñ ma.alūm nahīñ

pyāsā hai mirī hī tarah magar pyaas apnī bujhāne kī ḳhātir

jaatā hai kahāñ dhīre dhīre ye abr-e-ravāñ ma.alūm nahīñ

har saañs ke nāzuk vaqfa par dam le ke ye chaltī hai 'ahmar'

Thahregī magar kis manzil par ye umr-e-ravāñ ma.alūm nahīñ

sargarm-e-safar to hun lekin manzil ka nishan malum nahin

uThne ko to uTThe hain ye qadam jaana hai kahan malum nahin

shadabi-e-gulshan ka manzar hai zehn mein to mahfuz magar

kab shaKH jali kab phul luTe kab aai KHizan malum nahin

kaDkan bhi faza mein jari hai kaunde bhi lapakte jate hain

lahra ke giregi kis kis par ye barq-e-tapan malum nahin

hum dasht-nashin hain gulshan ki rangin fazaen kya jaanen

kanTon ki to basti dekhi hai phulon ka jahan malum nahin

pyasa hai meri hi tarah magar pyas apni bujhane ki KHatir

jata hai kahan dhire dhire ye abr-e-rawan malum nahin

har sans ke nazuk waqfa par dam le ke ye chalti hai 'ahmar'

Thahregi magar kis manzil par ye umr-e-rawan malum nahin