saron pe dhup to aankhon mein KHwab patthar ke

saroñ pe dhuup to āñkhoñ meñ ḳhvāb patthar ke

vo sañg-dil the so utre azaab patthar ke

havā-e-kūcha-e-jānāñ se haal pūchā thā

isī ḳhatā pe mile haiñ javāb patthar ke

ye kaun sañg-e-sifat pāniyoñ meñ utrā hai

uThe haiñ āb-e-ravāñ se habāb patthar ke

havā.eñ bāñjh zamīñ be-samar nazar vīrāñ

ki ab ke barse hoñ jaise sahāb patthar ke

talāsh-e-manzil-e-jānāñ meñ rahne vāloñ ko

ḳhudā mile bhī to ḳhāna-ḳharāb patthar ke

ye kaisā mausam-e-gul hai ye kaisā gulshan hai

ravish ravish meñ khile haiñ gulāb patthar ke

koī vahāñ ġham-e-insāñ kī baat kyā jaane

'safī' jahāñ pe hoñ izzat-ma.āb patthar ke

saron pe dhup to aankhon mein KHwab patthar ke

wo sang-dil the so utre azab patthar ke

hawa-e-kucha-e-jaanan se haal pucha tha

isi KHata pe mile hain jawab patthar ke

ye kaun sang-e-sifat paniyon mein utra hai

uThe hain aab-e-rawan se habab patthar ke

hawaen banjh zamin be-samar nazar viran

ki ab ke barse hon jaise sahab patthar ke

talash-e-manzil-e-jaanan mein rahne walon ko

KHuda mile bhi to KHana-KHarab patthar ke

ye kaisa mausam-e-gul hai ye kaisa gulshan hai

rawish rawish mein khile hain gulab patthar ke

koi wahan gham-e-insan ki baat kya jaane

'safi' jahan pe hon izzat-maab patthar ke