sarzamin-e-zulf mein kya dil Thikane lag gaya

sarzamīn-e-zulf meñ kyā dil Thikāne lag gayā

ik musāfir thā sar-e-manzil Thikāne lag gayā

gulshan-e-hastī nahīñ jā-e-shaguftan ai sabā

dekh jo ġhuncha gayā yaañ khil Thikāne lag gayā

aabrū rakh lī ḳhudā ne us kī ham-chashmoñ meñ aah

teġh-e-abrū kā tirī ghā.el Thikāne lag gayā

fursat-e-yak-dam pe phūlā thā hubāb-e-āb-jū

thā jo naqsh-e-saf.ha-e-bātil Thikāne lag gayā

jān-e-shīrīñ dī tire āshiq ne bhī juuñ kohkan

sar se apne maar kar ik sil Thikāne lag gayā

rakh qadam hoshyār ho kar ishq kī manzil meñ aah

jo huā is raah meñ ġhāfil Thikāne lag gayā

chhāñv meñ naḳhl-e-mizha kī loTtā hai tifl-e-ashk

ḳhaak meñ yā rafta rafta mil Thikāne lag gayā

āshnā koī na dekhā ġharq-e-bahr-e-ishq kā

ek dam meñ jo tah-e-sāhil Thikāne lag gayā

be-kalī kyūñkar na hove us kī furqat meñ 'nasīr'

ishq meñ us gul-badan ke dil Thikāne lag gayā

sarzamin-e-zulf mein kya dil Thikane lag gaya

ek musafir tha sar-e-manzil Thikane lag gaya

gulshan-e-hasti nahin ja-e-shaguftan ai saba

dekh jo ghuncha gaya yan khil Thikane lag gaya

aabru rakh li KHuda ne us ki ham-chashmon mein aah

tegh-e-abru ka teri ghael Thikane lag gaya

fursat-e-yak-dam pe phula tha hubab-e-ab-ju

tha jo naqsh-e-safha-e-baatil Thikane lag gaya

jaan-e-shirin di tere aashiq ne bhi jun kohkan

sar se apne mar kar ek sil Thikane lag gaya

rakh qadam hoshyar ho kar ishq ki manzil mein aah

jo hua is rah mein ghafil Thikane lag gaya

chhanw mein naKHl-e-mizha ki loTta hai tifl-e-ashk

KHak mein ya rafta rafta mil Thikane lag gaya

aashna koi na dekha gharq-e-bahr-e-ishq ka

ek dam mein jo tah-e-sahil Thikane lag gaya

be-kali kyunkar na howe us ki furqat mein 'nasir'

ishq mein us gul-badan ke dil Thikane lag gaya