sawal-e-dast-e-gadai pe KHatm hota hai

savāl-e-dast-e-gadā.ī pe ḳhatm hotā hai

ye shahr ḳhud se laḌā.ī pe ḳhatm hotā hai

musāfirān-e-mohabbat ko manzileñ kab haiñ

safar ye ābla-pā.ī pe ḳhatm hotā hai

ḳhudā ḳhudā hai ki mahdūd ho nahīñ saktā

ḳhudā kahāñ jo ḳhudā.ī pe ḳhatm hotā hai

kabhī visāl pe hotā hai iḳhtitām is kā

kabhī ye 'ishq judā.ī pe ḳhatm hotā hai

mirā jahān mirī chashm-e-ḳhūñ-fishāñ ho kar

kisī ke dast-e-hinā.ī pe ḳhatm hotā hai

sadā-e-jāñ ke ta'āqub kā silsila ik din

ḳhamoshiyoñ kī rasā.ī pe ḳhatm hotā hai

kisī ḳhayāl se ab tak jo ik ta'alluq thā

kuchh āñsuoñ kī rihā.ī pe ḳhatm hotā hai

sawal-e-dast-e-gadai pe KHatm hota hai

ye shahr KHud se laDai pe KHatm hota hai

musafiran-e-mohabbat ko manzilen kab hain

safar ye aabla-pai pe KHatm hota hai

KHuda KHuda hai ki mahdud ho nahin sakta

KHuda kahan jo KHudai pe KHatm hota hai

kabhi visal pe hota hai iKHtitam is ka

kabhi ye 'ishq judai pe KHatm hota hai

mera jahan meri chashm-e-KHun-fishan ho kar

kisi ke dast-e-hinai pe KHatm hota hai

sada-e-jaan ke ta'aqub ka silsila ek din

KHamoshiyon ki rasai pe KHatm hota hai

kisi KHayal se ab tak jo ek ta'alluq tha

kuchh aansuon ki rihai pe KHatm hota hai