sawal-e-sham pe aaya jawab-e-shab aaKHir

savāl-e-shām pe aaya javāb-e-shab āḳhir

kashīdgī kā na paayā magar sabab āḳhir

tumhāre ġham mire ḳhvāhāñ na merā apnā vajūd

kahāñ se lā.ūñgī maiñ shiddat-e-talab āḳhir

ināyat un kī jo vo haal pūchh leñ varna

kisī se un ke marāsim hue haiñ kab āḳhir

mohabbatoñ kī rivāyat to kā.enāt meñ hai

tumhārī aañkh hai avval na mere lab āḳhir

tumhāre naam suḳhan aur tum nahīñ samjhe

hamāre sher hue hissa-e-adab āḳhir

nahīñ milā koī ye baat pūchhne vaalā

banā liyā hai ye kyā zindagī kā Dhab āḳhir

uḌā jo tā.ir-e-hastī to phir na Thahregā

'nasīm' kar to sahī koshish-e-tarab āḳhir

sawal-e-sham pe aaya jawab-e-shab aaKHir

kashidgi ka na paya magar sabab aaKHir

tumhaare gham mere KHwahan na mera apna wajud

kahan se laungi main shiddat-e-talab aaKHir

inayat un ki jo wo haal puchh len warna

kisi se un ke marasim hue hain kab aaKHir

mohabbaton ki riwayat to kaenat mein hai

tumhaari aankh hai awwal na mere lab aaKHir

tumhaare nam suKHan aur tum nahin samjhe

hamare sher hue hissa-e-adab aaKHir

nahin mila koi ye baat puchhne wala

bana liya hai ye kya zindagi ka Dhab aaKHir

uDa jo tair-e-hasti to phir na Thahrega

'nasim' kar to sahi koshish-e-tarab aaKHir