sawal ko tarz-e-munfarid se uTha raha hun

savāl ko tarz-e-munfarid se uThā rahā huuñ

agar maiñ sab se judā rahā huuñ to kyā rahā huuñ

ajiib harakat hai zindagī ke jumūd meñ bhī

paḌā huuñ bistar pe aur lagtā hai jā rahā huuñ

kisī ne dekhā nahīñ hai jis ko vo ḳhvāb dekhā

jise sunāyā nahīñ gayā hai sunā rahā huuñ

ye zindagī hai agar udhar bhī jo hai idhar bhī

ho ilm kaise maiñ jā rahā huuñ ki aa rahā huuñ

kisī ne chalne kā kah diyā to nahīñ rukā maiñ

agar kisī ne kahā ki ruk jā khaḌā rahā huuñ

chabā.e jaate haiñ ek duuje ko dard aur maiñ

ye mujh ko andar maiñ us ko bāhar se khā rahā huuñ

sawal ko tarz-e-munfarid se uTha raha hun

agar main sab se juda raha hun to kya raha hun

ajib harakat hai zindagi ke jumud mein bhi

paDa hun bistar pe aur lagta hai ja raha hun

kisi ne dekha nahin hai jis ko wo KHwab dekha

jise sunaya nahin gaya hai suna raha hun

ye zindagi hai agar udhar bhi jo hai idhar bhi

ho ilm kaise main ja raha hun ki aa raha hun

kisi ne chalne ka kah diya to nahin ruka main

agar kisi ne kaha ki ruk ja khaDa raha hun

chabae jate hain ek duje ko dard aur main

ye mujh ko andar main us ko bahar se kha raha hun