sawal ye hai sabab kis se qatl ka puchhen

savāl ye hai sabab kis se qatl kā pūchheñ

ki jis ne qatl kiyā vo hī be zabāñ niklā

amīr-e-shahr to lafzoñ ke jaal buntā hai

magar jo sach thā vo fiqroñ ke darmiyāñ niklā

hamāre baa'd bhī kyā zeb-e-dār hogā koī

yahī savāl mirā zeb-e-dāstāñ niklā

ham apnī aql ko ilzām deñ ki qismat ko

hamāre daur meñ rahzan bhī pāsbāñ niklā

jabīñ jhukī to zamīñ uTh ke ājizī se milī

jo sar uThā to bahut duur āsmāñ niklā

rahe haiñ ham to 'karāmat' ga.e dinoñ ke naqīb

ki ham se ahd nayā saḳht bad-gumāñ niklā

sawal ye hai sabab kis se qatl ka puchhen

ki jis ne qatl kiya wo hi be zaban nikla

amir-e-shahr to lafzon ke jal bunta hai

magar jo sach tha wo fiqron ke darmiyan nikla

hamare ba'd bhi kya zeb-e-dar hoga koi

yahi sawal mera zeb-e-dastan nikla

hum apni aql ko ilzam den ki qismat ko

hamare daur mein rahzan bhi pasban nikla

jabin jhuki to zamin uTh ke aajizi se mili

jo sar uTha to bahut dur aasman nikla

rahe hain hum to 'karamat' gae dinon ke naqib

ki hum se ahd naya saKHt bad-guman nikla