saza se bach ke kai bar shatiron ki tarah

sazā se bach ke ka.ī baar shātiroñ kī tarah

maiñ apne sāmne aayā huuñ mujrmoñ kī tarah

vo zaḳhm jin kā badan par nishāñ nahīñ paḌtā

vahī to khulte haiñ sapnoñ meñ rauzanoñ kī tarah

har ek moḌ pe tajdīd-e-ahd lāzim thā

vo shaḳhs thā koī pur-pech rāstoñ kī tarah

yahī ḳhayāl mujhe aa ke chīr-phāḌ gayā

mile haiñ dost bhī yūsuf ke bhā.iyoñ kī tarah

zamīn paañv tale hai na āsmāñ sar par

paḌe haiñ ghar meñ ka.ī log be-gharoñ kī tarah

gayā to kuchh na rahā mere paas jiine ko

ġhanīm thā vo jo aayā thā dostoñ kī tarah

ye aur baat ki zāhir meñ kuchh nahīñ lagte

buland-o-bālā haiñ kuchh log parbatoñ kī tarah

vo rāste jo tire saath chal ke tai hote

lipaT ga.e mire paañv meñ dā.eroñ kī tarah

palak jhapakne meñ ik umr kaT ga.ī 'najmī'

guzar ga.e haiñ ka.ī saal sā.atoñ kī tarah

saza se bach ke kai bar shatiron ki tarah

main apne samne aaya hun mujrmon ki tarah

wo zaKHm jin ka badan par nishan nahin paDta

wahi to khulte hain sapnon mein rauzanon ki tarah

har ek moD pe tajdid-e-ahd lazim tha

wo shaKHs tha koi pur-pech raston ki tarah

yahi KHayal mujhe aa ke chir-phaD gaya

mile hain dost bhi yusuf ke bhaiyon ki tarah

zamin panw tale hai na aasman sar par

paDe hain ghar mein kai log be-gharon ki tarah

gaya to kuchh na raha mere pas jine ko

ghanim tha wo jo aaya tha doston ki tarah

ye aur baat ki zahir mein kuchh nahin lagte

buland-o-baala hain kuchh log parbaton ki tarah

wo raste jo tere sath chal ke tai hote

lipaT gae mere panw mein daeron ki tarah

palak jhapakne mein ek umr kaT gai 'najmi'

guzar gae hain kai sal saaton ki tarah