sehan-e-ainda ko imkan se dhoe jaen

sehan-e-ā.inda ko imkān se dho.e jaa.eñ

bāñjh hai qarya-e-jāñ aa.iye ro.e jaa.eñ

us sehr-zādī kī peshānī ko chūmeñ jhūmeñ

ḳhud meñ ḳhurshīd baneñ shab meñ piro.e jaa.eñ

ghaḌiyāñ kāñdhoñ pe rakhe ye mire peḌ se log

sub.h se shaam talak dhuup ko Dho.e jaa.eñ

ḳhvāb-e-derīna kā manzar bhī ajab manzar hai

ham tirī god meñ jāgeñ bhī to so.e jaa.eñ

dasht-e-dil meñ koī pagDanDī banā.eñ us par

DhūñDne jaa.eñ use dasht meñ kho.e jaa.eñ

sehan-e-ainda ko imkan se dhoe jaen

banjh hai qarya-e-jaan aaiye roe jaen

us sehr-zadi ki peshani ko chumen jhumen

KHud mein KHurshid banen shab mein piroe jaen

ghaDiyan kandhon pe rakhe ye mere peD se log

subh se sham talak dhup ko Dhoe jaen

KHwab-e-derina ka manzar bhi ajab manzar hai

hum teri god mein jagen bhi to soe jaen

dasht-e-dil mein koi pagDanDi banaen us par

DhunDne jaen use dasht mein khoe jaen