shaeri mujhko ajab haal mein le jati hai

shā.erī mujh ko ajab haal meñ le jaatī hai

kabhī mātam kabhī dhammāl meñ le jaatī hai

meñ kisī chashm-e-nigah-dār kī had meñ huuñ ki jo

mujh ko vāpas mire ahvāl meñ le jaatī hai

merī ḳhvāhish baḌī tafsīl-talab hai lekin

terī sūrat mujhe ijmāl meñ le jaatī hai

maiñ bichhātā huuñ musallā sar-e-mehrāb-e-niyāz

phir ibādat mujhe pātāl meñ le jaatī hai

maiñ to suntā hī nahīñ huuñ koī guftār-e-ḳhirad

ye kabhī qiil kabhī qaal meñ le jaatī hai

raas aa.ī na mujhe ā.ina-ḳhāne kī chamak

ye mirī shakl ko ashkāl meñ le jaatī hai

ḳhud-farāmoshī kī ik lahr kahīñ se aa kar

ek do baar mujhe saal meñ le jaatī hai

is liye sotā nahīñ maiñ ki nigār-e-duniyā

ḳhema-e-ḳhvāb se pinDāl meñ le jaatī hai

shaeri mujh ko ajab haal mein le jati hai

kabhi matam kabhi dhammal mein le jati hai

mein kisi chashm-e-nigah-dar ki had mein hun ki jo

mujh ko wapas mere ahwal mein le jati hai

meri KHwahish baDi tafsil-talab hai lekin

teri surat mujhe ijmal mein le jati hai

main bichhata hun musalla sar-e-mehrab-e-niyaz

phir ibaadat mujhe patal mein le jati hai

main to sunta hi nahin hun koi guftar-e-KHirad

ye kabhi qil kabhi qal mein le jati hai

ras aai na mujhe aaina-KHane ki chamak

ye meri shakl ko ashkal mein le jati hai

KHud-faramoshi ki ek lahr kahin se aa kar

ek do bar mujhe sal mein le jati hai

is liye sota nahin main ki nigar-e-duniya

KHema-e-KHwab se pinDal mein le jati hai