shairi hasil-e-diwangi-e-dil to nahin

shā.irī hāsil-e-dīvāngī-e-dil to nahīñ

narm halqe tirī zulfoñ ke salāsil to nahīñ

qaus-e-abrū ḳham-e-gesū shikan-e-peshānī

aaj bhī ishq ke pechīda masā.il to nahīñ

ik jhalak duur se dikhlā ke vo chhup jaate haiñ

sañg-e-mīl aa.e haiñ kuchh raah meñ manzil to nahīñ

tez-rau chāñd ghaTāoñ meñ tah-o-bālā hai

muztarib koī safīna pa.e sāhil to nahīñ

tishnagī meñ nazar aate haiñ sarāb-e-sahrā

har nazar par ye gumāñ hai koī maa.il to nahīñ

fāsle tai na hue rā-navardī ke baġhair

gāmzan jānib-e-rahrav koī manzil to nahīñ

kyuuñ na ġhāfil ho farā.ez se zamāna 'mānī'

kam yahāñ vaqt guzārī ke mashāġhil to nahīñ

shairi hasil-e-diwangi-e-dil to nahin

narm halqe teri zulfon ke salasil to nahin

qaus-e-abru KHam-e-gesu shikan-e-peshani

aaj bhi ishq ke pechida masail to nahin

ek jhalak dur se dikhla ke wo chhup jate hain

sang-e-mil aae hain kuchh rah mein manzil to nahin

tez-rau chand ghaTaon mein tah-o-baala hai

muztarib koi safina pae sahil to nahin

tishnagi mein nazar aate hain sarab-e-sahra

har nazar par ye guman hai koi mail to nahin

fasle tai na hue ra-nawardi ke baghair

gamzan jaanib-e-rahraw koi manzil to nahin

kyun na ghafil ho faraez se zamana 'mani'

kam yahan waqt guzari ke mashaghil to nahin