shaKH-e-buland-e-baam se ek din utar ke dekh

shāḳh-e-buland-e-bām se ik din utar ke dekh

ambār-e-barg-o-bār-e-ḳhizāñ meñ bikhar ke dekh

miTTī ke sādgī meñ alag sā jamāl hai

rañgoñ kī nik.hatoñ kī qabā taar karke dekh

imkāñ kī vus.atoñ ke ufuq zaar khul ga.e

par tolne lage haiñ parinde sahar ke dekh

zulmat kī kashtiyoñ ko bhañvar hai ye raushnī

dar khul rahe haiñ dānish-o-ilm-o-ḳhabar ke dekh

kyā jaane ġham kī aañch kā partav kahāñ paḌe

añgḌā.ī le rahe haiñ hayūle sharar ke dekh

sañgīn hādsoñ kī hikāyat tavīl hai

koh-e-girāñ kī baat na kar zaḳhm sar ke dekh

apnī basāratoñ ko jasārat kī aañch de

manzar isī nazar se jahān-e-digar ke dekh

pindār-e-sar-nigūñ kā junūñ mo'atabar nahīñ

bujhte hue charāġh kī lau tez karke dekh

'akbar' nidā-e-shab ko navā-e-sahar samajh

lau de rahe haiñ hausle ahl-e-nazar ke dekh

shaKH-e-buland-e-baam se ek din utar ke dekh

ambar-e-barg-o-bar-e-KHizan mein bikhar ke dekh

miTTi ke sadgi mein alag sa jamal hai

rangon ki nikhaton ki qaba tar karke dekh

imkan ki wusaton ke ufuq zar khul gae

par tolne lage hain parinde sahar ke dekh

zulmat ki kashtiyon ko bhanwar hai ye raushni

dar khul rahe hain danish-o-ilm-o-KHabar ke dekh

kya jaane gham ki aanch ka partaw kahan paDe

angDai le rahe hain hayule sharar ke dekh

sangin hadson ki hikayat tawil hai

koh-e-giran ki baat na kar zaKHm sar ke dekh

apni basaraton ko jasarat ki aanch de

manzar isi nazar se jahan-e-digar ke dekh

pindar-e-sar-nigun ka junun mo'atabar nahin

bujhte hue charagh ki lau tez karke dekh

'akbar' nida-e-shab ko nawa-e-sahar samajh

lau de rahe hain hausle ahl-e-nazar ke dekh