sham aai sehn-e-jaan mein KHauf ka bistar laga

shaam aa.ī sehn-e-jāñ meñ ḳhauf kā bistar lagā

mujh ko apnī ruuh kī vīrāniyoñ se Dar lagā

ek lamhe kī sharārat thī ki har lamha mujhe

āp-apnī samt se aatā huā patthar lagā

dhund sī phailī huī thī āsmāñ par duur tak

mauja-e-reg-e-ravāñ mujh ko tirā paikar lagā

ḳhāna-e-dil ko sajānā bhī hai ik shauq-e-fuzūl

kaun jhāñkegā yahāñ ye aa.ine bāhar lagā

jāgne vāloñ kī bastī se guzar jaate haiñ ḳhvāb

bhuul thī kis kī magar ilzām rātoñ par lagā

ḳhāmushī kī chār-dīvārī bhī shāyad gir chukī

aaj jaane kyā huā vo shaḳhs bhī be-ghar lagā

sham aai sehn-e-jaan mein KHauf ka bistar laga

mujh ko apni ruh ki viraniyon se Dar laga

ek lamhe ki shararat thi ki har lamha mujhe

aap-apni samt se aata hua patthar laga

dhund si phaili hui thi aasman par dur tak

mauja-e-reg-e-rawan mujh ko tera paikar laga

KHana-e-dil ko sajaana bhi hai ek shauq-e-fuzul

kaun jhankega yahan ye aaine bahar laga

jagne walon ki basti se guzar jate hain KHwab

bhul thi kis ki magar ilzam raaton par laga

KHamushi ki chaar-diwari bhi shayad gir chuki

aaj jaane kya hua wo shaKHs bhi be-ghar laga