sham dil ko bujhae jati hai

shaam dil ko bujhā.e jaatī hai

terī bāteñ sunā.e jaatī hai

ye udāsī bhī ḳhūbsūrat hai

mujh ko rañgīñ banā.e jaatī hai

raat kī aañkh se use dekho

kaise manzar dikhā.e jaatī hai

ek lamhe kī raushnī mujh meñ

ek duniyā basā.e jaatī hai

kitnī gambhīr hai ye tārīkī

mere andar samā.e jaatī hai

hijr kī shab hamārī jānib kyuuñ

dekh kar muskurā.e jaatī hai

zindagī bevafā sahī lekin

saath phir bhī nibhā.e jaatī hai

aap ta.abīr jānte hoñge

chāñdnī baukhlā.e jaatī hai

koī ḳhushbū gurezāñ hai mujh se

koī aahaT bulā.e jaatī hai

zindagī lāDlī sī shahzādī

merā āñchal uḌaa.e jaatī hai

sham dil ko bujhae jati hai

teri baaten sunae jati hai

ye udasi bhi KHubsurat hai

mujh ko rangin banae jati hai

raat ki aankh se use dekho

kaise manzar dikhae jati hai

ek lamhe ki raushni mujh mein

ek duniya basae jati hai

kitni gambhir hai ye tariki

mere andar samae jati hai

hijr ki shab hamari jaanib kyun

dekh kar muskurae jati hai

zindagi bewafa sahi lekin

sath phir bhi nibhae jati hai

aap tabir jaante honge

chandni baukhlae jati hai

koi KHushbu gurezan hai mujh se

koi aahaT bulae jati hai

zindagi laDli si shahzadi

mera aanchal uDae jati hai