sham jo chehre pe lahraate hue rang ki thi

shaam jo chehre pe lahrāte hue rang kī thī

baa'd tere vahī kājal meñ Dhale rang kī thī

na mohabbat kā junūñ thā na koī ḳhvāhish-e-lams

ye sharārat to fazāoñ meñ chhupe rang kī thī

dil se niklī thī koī baat gulābī aabī

lab se phūTī huī sargoshī har ik rang kī thī

kyā sitam thā ki vo aur ham se mohabbat-talabī

baat mushkil thī magar shoḳhī bhare rang kī thī

āsmāñ hadd-e-nazar shīsha-e-mai lagtā thā

shaam bhī sub.h ke rangoñ meñ Dhale rang kī thī

us ke lahje kī damak aur hī mahsūs huī

us kī āñkhoñ meñ chamak aaj na.e rang kī thī

yuuñ to maiñ sah nahīñ saktī thī hinā kī ḳhushbū

par vo shab narm hathelī pe saje rang kī thī

shāḳh-dar-shāḳh baḌī duur talak ham bhī ga.e

haat aa.ī nahīñ titlī bhī hare rang kī thī

bahr aisā ki bahut Duub ga.e dil-zadagāñ

mauj aisī ki har ik lamha na.e rang kī thī

sham jo chehre pe lahraate hue rang ki thi

ba'd tere wahi kajal mein Dhale rang ki thi

na mohabbat ka junun tha na koi KHwahish-e-lams

ye shararat to fazaon mein chhupe rang ki thi

dil se nikli thi koi baat gulabi aabi

lab se phuTi hui sargoshi har ek rang ki thi

kya sitam tha ki wo aur hum se mohabbat-talabi

baat mushkil thi magar shoKHi bhare rang ki thi

aasman hadd-e-nazar shisha-e-mai lagta tha

sham bhi subh ke rangon mein Dhale rang ki thi

us ke lahje ki damak aur hi mahsus hui

us ki aankhon mein chamak aaj nae rang ki thi

yun to main sah nahin sakti thi hina ki KHushbu

par wo shab narm hatheli pe saje rang ki thi

shaKH-dar-shaKH baDi dur talak hum bhi gae

hat aai nahin titli bhi hare rang ki thi

bahr aisa ki bahut Dub gae dil-zadagan

mauj aisi ki har ek lamha nae rang ki thi