sham ka gham bhi jafakar udasi meri

shaam kā ġham bhī jafākār udāsī merī

zaḳhm de jaatī hai har baar udāsī merī

jab bhī hoñToñ ko hañsāyā yahī pūchhā ḳhud se

kyuuñ hai ḳhushiyoñ pe kaḌā baar udāsī merī

mere saa.e se lipaTne ko tarastī rahtī

ban ga.ī merī talabgār udāsī merī

gahre tanhā.ī ke aalam meñ sulā jaatī hai

kitnī ban jaatī hai ḳhūñ-ḳhvār udāsī merī

mere ashkoñ se bahī ban ke lahū dil kā yuuñ

ho kaTīlī koī talvār udāsī merī

'sārthī' luT na kahīñ jaa.e aqad bhī tujh se

mujh se kahtī hai ka.ī baar udāsī merī

sham ka gham bhi jafakar udasi meri

zaKHm de jati hai har bar udasi meri

jab bhi honTon ko hansaya yahi puchha KHud se

kyun hai KHushiyon pe kaDa bar udasi meri

mere sae se lipaTne ko tarasti rahti

ban gai meri talabgar udasi meri

gahre tanhai ke aalam mein sula jati hai

kitni ban jati hai KHun-KHwar udasi meri

mere ashkon se bahi ban ke lahu dil ka yun

ho kaTili koi talwar udasi meri

'sarthi' luT na kahin jae aqad bhi tujh se

mujh se kahti hai kai bar udasi meri