sham ke sath jala ek diya aahista

shaam ke saath jalā ek diyā āhista

bujh na jaa.e kahīñ ai bād-e-sabā āhista

yād-e-ayyām kī talḳhī bhī milī hai us meñ

jaam hoñToñ se lagāo to zarā āhista

zaḳhm hī zaḳhm hai sar-tā-ba-qadam jism mirā

phuuT jā.ūñ na kahīñ dast-e-havā āhista

ba.ad muddat ke abhī aañkh lagī hai ġham kī

koī nauha koī naġhma ki sadā āhista

TuuT jaa.eñ na kahīñ zaḳhm-e-jigar ke Tāñke

ai masīhā zarā takmīl-e-vafā āhista

maslahat-kesh ḳharābe meñ shu.ūr-e-hastī

jurm āhista abhī harf-e-jafā āhista

ḳhvāb kī vādī-e-gulnār se jaagī 'husnā'

koī detā hai mujhe jaise sadā āhista

sham ke sath jala ek diya aahista

bujh na jae kahin ai baad-e-saba aahista

yaad-e-ayyam ki talKHi bhi mili hai us mein

jam honTon se lagao to zara aahista

zaKHm hi zaKHm hai sar-ta-ba-qadam jism mera

phuT jaun na kahin dast-e-hawa aahista

baad muddat ke abhi aankh lagi hai gham ki

koi nauha koi naghma ki sada aahista

TuT jaen na kahin zaKHm-e-jigar ke Tanke

ai masiha zara takmil-e-wafa aahista

maslahat-kesh KHarabe mein shuur-e-hasti

jurm aahista abhi harf-e-jafa aahista

KHwab ki wadi-e-gulnar se jagi 'husna'

koi deta hai mujhe jaise sada aahista