sham ki rakh badan par mal kar qashqa khinch sitaron se

shaam kī raakh badan par mal kar qashqa khīñch sitāroñ se

raat siñghāsan apnā hī hai kah de hijr ke māroñ se

kuchh be-hangam āvāzeñ thiiñ kuchh saa.e se phirte the

āñkheñ muuñd ke guzre the ham duniyā ke bāzāroñ se

aur achānak jī uThte haiñ band kivāḌoñ vaale log

chhan-chhan kar āvāz sī koī aatī hai dīvāroñ se

ruuh ke vīrāñ tah-ḳhāne tak roz koī aa jaatā hai

tanhā.ī ke mausam vaalī ḳhālī rāh-guzāroñ se

kashtī kab kī Duub chukī hai lekin ab tak us kā pata

dariyā dariyā pūchh rahā hai jaane kaun kināroñ se

diye kī āḳhirī saañs bujhī aur aañkh uThī ākāsh kī samt

kitne hī sar jhāñk rahe the raat kī nam dīvāroñ se

sham ki rakh badan par mal kar qashqa khinch sitaron se

raat singhasan apna hi hai kah de hijr ke maron se

kuchh be-hangam aawazen thin kuchh sae se phirte the

aankhen mund ke guzre the hum duniya ke bazaron se

aur achanak ji uThte hain band kiwaDon wale log

chhan-chhan kar aawaz si koi aati hai diwaron se

ruh ke viran tah-KHane tak roz koi aa jata hai

tanhai ke mausam wali KHali rah-guzaron se

kashti kab ki Dub chuki hai lekin ab tak us ka pata

dariya dariya puchh raha hai jaane kaun kinaron se

diye ki aaKHiri sans bujhi aur aankh uThi aakash ki samt

kitne hi sar jhank rahe the raat ki nam diwaron se