sham thi aur barg-o-gul shal the magar saba bhi thi

shaam thī aur barg-o-gul shal the magar sabā bhī thī

ek ajiib sukūt thā ek ajab sadā bhī thī

ek malāl kā sā haal mahv thā apne haal meñ

raqs-o-navā the be-taraf mahfil-e-shab bapā bhī thī

sāme.a-e-sadā-e-jāñ be-sarokār thā ki thā

ek gumāñ kī dāstāñ bar-lab nīm-vā bhī thī

kyā mah-o-sāl mājrā ek palak thī jo miyāñ

baat kī ibtidā bhī thī baat kī intihā bhī thī

ek surūd-e-raushanī nīma-e-shab kā ḳhvāb thā

ek ḳhamosh tīrgī sāneha-āshnā bhī thī

dil tirā peshā-e-gila-e-kām ḳharāb kar gayā

varna to ek rañj kī hālat-be-gila bhī thī

dil ke muāmle jo the un meñ se ek ye bhī hai

ik havas thī dil meñ jo dil se gurez-pā bhī thī

bāl-o-par-e-ḳhayāl ko ab nahīñ samt-o-sū nasīb

pahle thī ik ajab fazā aur jo pur-fazā bhī thī

ḳhushk hai chashma-sār-e-jāñ zard hai sabza-zār-e-dil

ab to ye sochiye ki yaañ pahle kabhī havā bhī thī

sham thi aur barg-o-gul shal the magar saba bhi thi

ek ajib sukut tha ek ajab sada bhi thi

ek malal ka sa haal mahw tha apne haal mein

raqs-o-nawa the be-taraf mahfil-e-shab bapa bhi thi

samea-e-sada-e-jaan be-sarokar tha ki tha

ek guman ki dastan bar-lab nim-wa bhi thi

kya mah-o-sal majra ek palak thi jo miyan

baat ki ibtida bhi thi baat ki intiha bhi thi

ek surud-e-raushani nima-e-shab ka KHwab tha

ek KHamosh tirgi saneha-ashna bhi thi

dil tera pesha-e-gila-e-kaam KHarab kar gaya

warna to ek ranj ki haalat-be-gila bhi thi

dil ke muamle jo the un mein se ek ye bhi hai

ek hawas thi dil mein jo dil se gurez-pa bhi thi

baal-o-par-e-KHayal ko ab nahin samt-o-su nasib

pahle thi ek ajab faza aur jo pur-faza bhi thi

KHushk hai chashma-sar-e-jaan zard hai sabza-zar-e-dil

ab to ye sochiye ki yan pahle kabhi hawa bhi thi