shayad kisi ne aap se ye kah diya ghalat

shāyad kisī ne aap se ye kah diyā ġhalat

mumkin hai aap hī ne kahīñ sun liyā ġhalat

vallāh ab bhī aap kā maiñ jāñ-nisār huuñ

maiñ aur aap hī se kahūñgā bhalā ġhalat

muddat ke baad aaj nazar aa.e shukr hai

dekhā ye jab se tum ko mirā ġham huā ġhalat

ham ko nahīñ hai vāsta kuchh ishq se vale

charchā kisī ne kar diyā hai jā-ba-jā ġhalat

jaate the ghar raqīb ke par aa ga.e yahāñ

un ko batā diyā hai kisī ne patā ġhalat

ham ne sunā ki hazrat-e-'kāmil' guzar ga.e

hai aarzū ki nikle ḳhabar yā-ḳhudā ġhalat

shayad kisi ne aap se ye kah diya ghalat

mumkin hai aap hi ne kahin sun liya ghalat

wallah ab bhi aap ka main jaan-nisar hun

main aur aap hi se kahunga bhala ghalat

muddat ke baad aaj nazar aae shukr hai

dekha ye jab se tum ko mera gham hua ghalat

hum ko nahin hai wasta kuchh ishq se wale

charcha kisi ne kar diya hai ja-ba-ja ghalat

jate the ghar raqib ke par aa gae yahan

un ko bata diya hai kisi ne pata ghalat

hum ne suna ki hazrat-e-'kaamil' guzar gae

hai aarzu ki nikle KHabar ya-KHuda ghalat