shayad ruKH-e-hayat se sarke naqab aur

shāyad ruḳh-e-hayāt se sarke naqāb aur

bhar do mire subū meñ sharāb-e-gulāb aur

hogī mire subū se numūd-e-hazār-sub.h

ubhreñge is ufuq se abhī āftāb aur

aatī hai kū-e-dār-o-rasan se sadā hanūz

aa.e idhar jo hai koī ḳhāna-ḳharāb aur

maḳhmūr-e-bū-e-zulf na ā.eñge hosh meñ

chhiḌke abhī nasīm-e-bahārāñ gulāb aur

ai vārisān-e-satvat-parvez hoshiyār

dāmān-e-vaqt meñ haiñ abhī inqalāb aur

aa.ī 'zafar' jo raat zabāñ par hadīs-e-dost

nāgāh baḌh ga.ī mire jauhar kī aab aur

shayad ruKH-e-hayat se sarke naqab aur

bhar do mere subu mein sharab-e-gulab aur

hogi mere subu se numud-e-hazar-subh

ubhrenge is ufuq se abhi aaftab aur

aati hai ku-e-dar-o-rasan se sada hanuz

aae idhar jo hai koi KHana-KHarab aur

maKHmur-e-bu-e-zulf na aaenge hosh mein

chhiDke abhi nasim-e-bahaaran gulab aur

ai warisan-e-satwat-parwez hoshiyar

daman-e-waqt mein hain abhi inqalab aur

aai 'zafar' jo raat zaban par hadis-e-dost

nagah baDh gai mere jauhar ki aab aur