shab-e-firaq mein ye dil se guftugu kya hai

shab-e-firāq meñ ye dil se guftugū kyā hai

marī umiid haiñ vo un kī aarzū kyā hai

rageñ tamām badan kī idhar ko khīñchtī haiñ

kisī kā haath qarīb-e-rag-e-gulū kyā hai

shikasta-e-ābla-e-pā ne aabrū rakh lī

khulā na haal ki paanī hai kyā lahū kyā hai

maiñ apnī maut pe raazī vo laash uThāne par

ab aage dekhnā hai marzī-e-adū kyā hai

ye kis ko aa.ine meñ aap dekhe jaate haiñ

jahāñ meñ aap se bhī koī ḳhūb-rū kyā hai

sabab bhī pūchh lo un kī zidoñ se ai 'jāved'

rulā rulā ke hañsā.eñ ye un kī ḳhū kyā hai

shab-e-firaq mein ye dil se guftugu kya hai

mari umid hain wo un ki aarzu kya hai

ragen tamam badan ki idhar ko khinchti hain

kisi ka hath qarib-e-rag-e-gulu kya hai

shikasta-e-abla-e-pa ne aabru rakh li

khula na haal ki pani hai kya lahu kya hai

main apni maut pe raazi wo lash uThane par

ab aage dekhna hai marzi-e-adu kya hai

ye kis ko aaine mein aap dekhe jate hain

jahan mein aap se bhi koi KHub-ru kya hai

sabab bhi puchh lo un ki zidon se ai 'jawed'

rula rula ke hansaen ye un ki KHu kya hai