shab-e-firaq na kaTe kaTe hai kya kije

shab-e-firāq na kaaTe kaTe hai kyā kiije

na sub.h ho.e hai na pau phaTe hai kyā kiije

safā thā aks-e-ruḳh us ke se dil kā ā.īna

ab us pe zañg-e-kudūrat aTe hai kyā kiije

rahīm-o-rām kī sumran hai shaiḳh-o-hindū ko

dil us ke naam kī raTnā raTe hai kyā kiije

basān har mizha par pāra-e-dil-e-majrūh

har ek pal na shumurda baTe hai kyā kiije

piye thā raat to kal ġhair paas yaar sharāb

aur aaj qasmeñ hī khā khā naTe hai kyā kiije

ye juuñ juuñ vā'de ke din raat paḌte jaate haiñ

ghaḌī ghaḌī meñ mirā jī kaTe hai kyā kiije

raqīb jam ke ye baiThā ki ham uThe nā-chār

ye patthar ab na haTā.e haTe hai kyā kiije

jigar ke TukḌoñ se jab tak ki god bhar le aa.e

ye tifl-e-ashk to ro-ro haTe hai kyā kiije

ye duḳht-e-raz koī aise luTī mile hai 'muhib'

dil us kī taak meñ apnā luTe hai kyā kiije

shab-e-firaq na kaTe kaTe hai kya kije

na subh hoe hai na pau phaTe hai kya kije

safa tha aks-e-ruKH us ke se dil ka aaina

ab us pe zang-e-kudurat aTe hai kya kije

rahim-o-ram ki sumran hai shaiKH-o-hindu ko

dil us ke nam ki raTna raTe hai kya kije

basan har mizha par para-e-dil-e-majruh

har ek pal na shumurda baTe hai kya kije

piye tha raat to kal ghair pas yar sharab

aur aaj qasmen hi kha kha naTe hai kya kije

ye jun jun wa'de ke din raat paDte jate hain

ghaDi ghaDi mein mera ji kaTe hai kya kije

raqib jam ke ye baiTha ki hum uThe na-chaar

ye patthar ab na haTae haTe hai kya kije

jigar ke TukDon se jab tak ki god bhar le aae

ye tifl-e-ashk to ro-ro haTe hai kya kije

ye duKHt-e-raz koi aise luTi mile hai 'muhib'

dil us ki tak mein apna luTe hai kya kije