shab-e-hijran mein dam nikalta hai

shab-e-hijrāñ meñ dam nikaltā hai

kab payām-e-visāl Taltā hai

dil-e-bīmār se hai tañg masīh

daaġh se āftāb jaltā hai

be-zarī se huuñ pā.emāl-e-butāñ

zor kis kā ḳhudā se chaltā hai

dil na le ai sanam barā.e-ḳhudā

is se kuchh jī mirā bahaltā hai

ātish-e-ishq zulf-e-pechāñ hai

haDDiyoñ se dhuāñ nikaltā hai

tere hañsne pe maiñ jo rotā huuñ

abr mānind-e-barq jaltā hai

tujh se ai ashk māh-e-furqat ho

rañg kyā kyā falak badaltā hai

apne bīmār ko na pūchh masīh

ab koī dam meñ dam nikaltā hai

daaġh kā jism-e-zār se hai faroġh

ḳhas se jaise charāġh jaltā hai

sard yā arsh pā-e-qātil par

laash par vo bhī haath maltā hai

shab-e-hijran mein dam nikalta hai

kab payam-e-visal Talta hai

dil-e-bimar se hai tang masih

dagh se aaftab jalta hai

be-zari se hun paemal-e-butan

zor kis ka KHuda se chalta hai

dil na le ai sanam barae-KHuda

is se kuchh ji mera bahalta hai

aatish-e-ishq zulf-e-pechan hai

haDDiyon se dhuan nikalta hai

tere hansne pe main jo rota hun

abr manind-e-barq jalta hai

tujh se ai ashk mah-e-furqat ho

rang kya kya falak badalta hai

apne bimar ko na puchh masih

ab koi dam mein dam nikalta hai

dagh ka jism-e-zar se hai farogh

KHas se jaise charagh jalta hai

sard ya arsh pa-e-qatil par

lash par wo bhi hath malta hai