shab-e-hijran mein mat puchho ki kin baaton mein rahta hun

shab-e-hijrāñ meñ mat pūchho ki kin bātoñ meñ rahtā huuñ

tasavvur bāñdh us kā sub.h tak kuchh kuchh maiñ kahtā huuñ

jo dekho ġhaur kar to juz o kul bilkul mujhī meñ hai

kabhī huuñ ik hubāb-āsā kabhī dariyā ho bahtā huuñ

tire rukne se pyāre bas mirā dam rukne lagtā hai

nahīñ to boltā tū boliyāñ kin kin kī sahtā huuñ

nahīñ miltī hai fursat ġhair use ghere hī rahte haiñ

kahūñ kuchh hāl-e-dil bas DhūñDhtā itnā subahtā huuñ

ye josh-e-ashk ne tūfāñ uThāyā hai ki ai 'jur.at'

kahe hai kishvar-e-tan meñ tū koī dam ko Dhahtā huuñ

shab-e-hijran mein mat puchho ki kin baaton mein rahta hun

tasawwur bandh us ka subh tak kuchh kuchh main kahta hun

jo dekho ghaur kar to juz o kul bilkul mujhi mein hai

kabhi hun ek hubab-asa kabhi dariya ho bahta hun

tere rukne se pyare bas mera dam rukne lagta hai

nahin to bolta tu boliyan kin kin ki sahta hun

nahin milti hai fursat ghair use ghere hi rahte hain

kahun kuchh haal-e-dil bas DhunDhta itna subahta hun

ye josh-e-ashk ne tufan uThaya hai ki ai 'jurat'

kahe hai kishwar-e-tan mein tu koi dam ko Dhahta hun