shab-e-mahtab ne shah-nashin pe ajib gul sa khila diya

shab-e-māhtāb ne shah-nashīñ pe ajiib gul sā khilā diyā

mujhe yuuñ lagā kisī haath ne mire dil pe tiir chalā diyā

koī aisī baat zarūr thī shab-e-va.ada vo jo na aa sakā

koī apnā vahm thā darmiyāñ yā ghaTā ne us ko Darā diyā

yahī aan thī mirī zindagī lagī aag dil meñ to uf na kī

jo jahāñ meñ koī na kar sakā vo kamāl kar ke dekhā diyā

ye jo laal rañg patañg kā sar-e-āsmāñ hai uḌā huā

ye charāġh dast-e-hinā kā hai jo havā meñ us ne jalā diyā

mire paas aisā tilism hai jo ka.ī zamānoñ kā ism hai

use jab bhī sochā bulā liyā use jo bhī chāhā banā diyā

shab-e-mahtab ne shah-nashin pe ajib gul sa khila diya

mujhe yun laga kisi hath ne mere dil pe tir chala diya

koi aisi baat zarur thi shab-e-wada wo jo na aa saka

koi apna wahm tha darmiyan ya ghaTa ne us ko Dara diya

yahi aan thi meri zindagi lagi aag dil mein to uf na ki

jo jahan mein koi na kar saka wo kamal kar ke dekha diya

ye jo lal rang patang ka sar-e-asman hai uDa hua

ye charagh dast-e-hina ka hai jo hawa mein us ne jala diya

mere pas aisa tilism hai jo kai zamanon ka ism hai

use jab bhi socha bula liya use jo bhi chaha bana diya