shab-e-mahtab bhi apni bhari-barsat bhi apni

shab-e-mahtāb bhī apnī bharī-barsāt bhī apnī

tumhāre dam-qadam se zindagī thī zindagī apnī

yahāñ pābandī, nārāzī, junūnī baat hai varna

jamāl-e-yār se kuchh kam nahīñ tābindagī apnī

mujhe shādābī-e-sahne-e-chaman se ḳhauf aatā hai

yahī andāz the jab luuT ga.ī thī zindagī apnī

tumhārā ġham ise āshob-e-sarasar bachā.e gā

havāoñ se bhaḌak uTThī hai sham-e-zindagī apnī

magar tum bhī to ik bū-e-gurezāñ kī tarah nikle

guzarne ko guzar jaatī bahār-e-dostī apnī

zahīr is chashm-e-avval pe yūñhī mahsūs hotā hai

baḌī muddat se hai jaise kisī se dostī apnī

shab-e-mahtab bhi apni bhari-barsat bhi apni

tumhaare dam-qadam se zindagi thi zindagi apni

yahan pabandi, naraazi, jununi baat hai warna

jamal-e-yar se kuchh kam nahin tabindagi apni

mujhe shadabi-e-sahne-e-chaman se KHauf aata hai

yahi andaz the jab luT gai thi zindagi apni

tumhaara gham ise aashob-e-sarasar bachae ga

hawaon se bhaDak uTThi hai sham-e-zindagi apni

magar tum bhi to ek bu-e-gurezan ki tarah nikle

guzarne ko guzar jati bahaar-e-dosti apni

zahir is chashm-e-awwal pe yunhi mahsus hota hai

baDi muddat se hai jaise kisi se dosti apni