shab-e-tar thi abhi har taraf ye diya sa kis ne jala diya

shab-e-tār thī abhī har taraf ye diyā sā kis ne jalā diyā

ye ziyā.eñ kis ne bikher diiñ ye zamīr kis ne jagā diyā

ye kamāl jehd-o-'amal kā hai ye mire lahū kā hai mo'jiza

jo chaman kabhī thā ḳhizāñ ḳhizāñ use nau-bahār banā diyā

mirī justujū meñ kamī nahīñ mire hausle bhī buland haiñ

mire zauq-e-jehd-o-'amal ne hī mirī sarzamīñ ko sajā diyā

maiñ ne raat din ke riyāz se kiyā 'ilm ko 'amal-āshnā

mujhe 'ilm-e-haq se jo kuchh milā use 'aam maiñ ne banā diyā

mire paak des kī sarzamīn jo kabhī Thanī tirī kufr se

tire vāste tire beToñ ne rah-e-haq meñ jaañ ko luTā diyā

mujhe ab ḳhizāñ kā ḳhatar nahīñ mujhe ab ghaTāoñ se kyā gila

mire ḳhūn-e-dil kī bahār ne mire gulsitāñ ko sajā diyā

hameñ ḳhauf ho to ḳhudā kā ho ye samāj kyā ye rivāj kyā

ye hī shirk hai yahī bid'ateñ inhī sab ne ham ko miTā diyā

mirī kam-nasībī to dekhiye ki na mil sakīñ kabhī manzileñ

kisī rāhbar ne bhī aaj tak mujhe raah kā na pata diyā

tū ne baat 'sīmīñ' kharī kahī ye bayān terā hai pur-asar

tire dard ne tire soz ne sar-e-bazm sab ko rulā diyā

shab-e-tar thi abhi har taraf ye diya sa kis ne jala diya

ye ziyaen kis ne bikher din ye zamir kis ne jaga diya

ye kamal jehd-o-'amal ka hai ye mere lahu ka hai mo'jiza

jo chaman kabhi tha KHizan KHizan use nau-bahaar bana diya

meri justuju mein kami nahin mere hausle bhi buland hain

mere zauq-e-jehd-o-'amal ne hi meri sarzamin ko saja diya

main ne raat din ke riyaz se kiya 'ilm ko 'amal-ashna

mujhe 'ilm-e-haq se jo kuchh mila use 'am main ne bana diya

mere pak des ki sarzamin jo kabhi Thani teri kufr se

tere waste tere beTon ne rah-e-haq mein jaan ko luTa diya

mujhe ab KHizan ka KHatar nahin mujhe ab ghaTaon se kya gila

mere KHun-e-dil ki bahaar ne mere gulsitan ko saja diya

hamein KHauf ho to KHuda ka ho ye samaj kya ye riwaj kya

ye hi shirk hai yahi bid'aten inhi sab ne hum ko miTa diya

meri kam-nasibi to dekhiye ki na mil sakin kabhi manzilen

kisi rahbar ne bhi aaj tak mujhe rah ka na pata diya

tu ne baat 'simin' khari kahi ye bayan tera hai pur-asar

tere dard ne tere soz ne sar-e-bazm sab ko rula diya