shab-e-wada andhera chha gaya kya tum na aaoge

shab-e-va.ada añdherā chhā gayā kyā tum na aaoge

falak par chāñd bhī kajlā gayā kyā tum na aaoge

tumhārā hijr aafat Dhā gayā kyā tum na aaoge

hamārā dil bahut ghabrā gayā kyā tum na aaoge

chaman meñ har taraf gulhā-e-rañgīñ muskurā uThe

bahāroñ kā zamāna aa gayā kyā tum na aaoge

hamārī jaan par ban aatī hai daur-e-mohabbat meñ

junūn-e-dil qayāmat Dhā gayā kyā tum na aaoge

kahāñ tak intizār-e-jalva meñ taḌpeñ mirī āñkheñ

dil-e-betāb ab ghabrā gayā kyā tum na aaoge

marīz-e-dard-o-ġham par naza.a kā aalam huā taarī

sar-e-bālīñ zamāna aa gayā kyā tum na aaoge

sar-e-mai-ḳhāna ik duniyā chalī aatī hai piine ko

vo dekho mast bādal chhā gayā kyā tum na aaoge

dam-e-āḳhir na thiiñ kuchh aur bāteñ us ke hoñToñ par

marīz-e-ġham yahī kahtā rahā kyā tum na aaoge

tumhārī yaad meñ 'ejāz' apne hosh kho baiThā

use tanhā.ī kā ġham khā gayā kyā tum na aaoge

shab-e-wada andhera chha gaya kya tum na aaoge

falak par chand bhi kajla gaya kya tum na aaoge

tumhaara hijr aafat Dha gaya kya tum na aaoge

hamara dil bahut ghabra gaya kya tum na aaoge

chaman mein har taraf gulha-e-rangin muskura uThe

bahaaron ka zamana aa gaya kya tum na aaoge

hamari jaan par ban aati hai daur-e-mohabbat mein

junun-e-dil qayamat Dha gaya kya tum na aaoge

kahan tak intizar-e-jalwa mein taDpen meri aankhen

dil-e-betab ab ghabra gaya kya tum na aaoge

mariz-e-dard-o-gham par naza ka aalam hua tari

sar-e-baalin zamana aa gaya kya tum na aaoge

sar-e-mai-KHana ek duniya chali aati hai pine ko

wo dekho mast baadal chha gaya kya tum na aaoge

dam-e-aKHir na thin kuchh aur baaten us ke honTon par

mariz-e-gham yahi kahta raha kya tum na aaoge

tumhaari yaad mein 'ejaz' apne hosh kho baiTha

use tanhai ka gham kha gaya kya tum na aaoge