shab-e-wasl hum muKHtasar dekhte hain

shab-e-vasl ham muḳhtasar dekhte haiñ

idhar aañkh jhapkī sahar dekhte haiñ

marīz-e-mohabbat kī ho ḳhair yā-rab

ye rah rah ke kyoñ chārāgar dekhte haiñ

pa.e-pursish-e-ġham koī aa rahā hai

ham aahoñ kā apnī asar dekhte haiñ

hameñ yaad aatā hai sehn-e-gulistāñ

jo zindāñ ke dīvār-o-dar dekhte haiñ

har ik shai meñ hai tere jalvoñ kā partav

tujhe saaf ahl-e-nazar dekhte haiñ

tasavvur jo hai zulf-o-āriz kā un kī

ba-yak-vaqt shām-o-sahar dekhte haiñ

asar kar chalī hai mirī aah 'paikar'

unheñ aaj nazdīk-tar dekhte haiñ

shab-e-wasl hum muKHtasar dekhte hain

idhar aankh jhapki sahar dekhte hain

mariz-e-mohabbat ki ho KHair ya-rab

ye rah rah ke kyon chaaragar dekhte hain

pae-pursish-e-gham koi aa raha hai

hum aahon ka apni asar dekhte hain

hamein yaad aata hai sehn-e-gulistan

jo zindan ke diwar-o-dar dekhte hain

har ek shai mein hai tere jalwon ka partaw

tujhe saf ahl-e-nazar dekhte hain

tasawwur jo hai zulf-o-ariz ka un ki

ba-yak-waqt sham-o-sahar dekhte hain

asar kar chali hai meri aah 'paikar'

unhen aaj nazdik-tar dekhte hain