shab-e-wasl unhen zid agar ho gai

shab-e-vasl unheñ zid agar ho ga.ī

naqāb uThte uThte sahar ho ga.ī

shab-e-vasl kyā muḳhtasar ho ga.ī

palak mārte hī sahar ho ga.ī

agar un kī tirchhī nazar ho ga.ī

mirī jaan sīna-sipar ho ga.ī

na kuchh mū-shigāfoñ se uqda khulā

muammā tumhārī kamar ho ga.ī

lagī hai jo ashkoñ kī har dam jhaḌī

ghaTā kyā mirī chashm-e-tar ho ga.ī

haram chhoḌ kar maiñ gayā sū-e-dair

tabī.at kidhar se kidhar ho ga.ī

nahīñ rahm us sang-dil ko zarā

mirī aah kyā be-asar ho ga.ī

chhupāyā bahut ishq ham ne magar

unheñ sab se pahle ḳhabar ho ga.ī

ḳhabar lī na us ġhairat-e-māh ne

taḌapte rahe raat bhar ho ga.ī

nahīñ kaaTe kaTtī hai furqat kī shab

ghaḌī mujh ko ik ik pahar ho ga.ī

chhue paañv maiñ ne jo us shoḳh ke

hinā bā.is-e-dard-e-sar ho ga.ī

buto tum ko sajde kiye is qadar

hamārī jabīñ sang-e-dar ho ga.ī

kiyā us shakar-lab ne e.ajāz ye

bajā.ī jo nai nai-shakar ho ga.ī

jamāyā jo 'vahbī' ne apnā qadam

laḌā.ī mohabbat kī sar ho ga.ī

shab-e-wasl unhen zid agar ho gai

naqab uThte uThte sahar ho gai

shab-e-wasl kya muKHtasar ho gai

palak marte hi sahar ho gai

agar un ki tirchhi nazar ho gai

meri jaan sina-sipar ho gai

na kuchh mu-shigafon se uqda khula

muamma tumhaari kamar ho gai

lagi hai jo ashkon ki har dam jhaDi

ghaTa kya meri chashm-e-tar ho gai

haram chhoD kar main gaya su-e-dair

tabiat kidhar se kidhar ho gai

nahin rahm us sang-dil ko zara

meri aah kya be-asar ho gai

chhupaya bahut ishq hum ne magar

unhen sab se pahle KHabar ho gai

KHabar li na us ghairat-e-mah ne

taDapte rahe raat bhar ho gai

nahin kaTe kaTti hai furqat ki shab

ghaDi mujh ko ek ek pahar ho gai

chhue panw main ne jo us shoKH ke

hina bais-e-dard-e-sar ho gai

buto tum ko sajde kiye is qadar

hamari jabin sang-e-dar ho gai

kiya us shakar-lab ne eajaz ye

bajai jo nai nai-shakar ho gai

jamaya jo 'wahbi' ne apna qadam

laDai mohabbat ki sar ho gai