shab-e-visal ki hasrat ne mar Dala hai

shab-e-visāl kī hasrat ne maar Daalā hai

faqīr-e-ishq ko chāhat ne maar Daalā hai

sunā hai ishq meñ marte haiñ be-vafā.ī se

mujhe to terī mohabbat ne maar Daalā hai

zarā sī baat pe laḌkī na ḳhud-kushī kartī

use samāj kī ġhairat ne maar Daalā hai

use hī chhoḌnā paḌtā hai ghar mohabbat kā

jise bhī ghar kī zarūrat ne maar Daalā hai

bahut se log zalālat meñ maare jaate haiñ

kisī kisī ko sharāfat ne maar Daalā hai

vabā ye kaisī hai baiThe haiñ log haath dhare

sabhī ko ek sī fursat ne maar Daalā hai

shab-e-visal ki hasrat ne mar Dala hai

faqir-e-ishq ko chahat ne mar Dala hai

suna hai ishq mein marte hain be-wafai se

mujhe to teri mohabbat ne mar Dala hai

zara si baat pe laDki na KHud-kushi karti

use samaj ki ghairat ne mar Dala hai

use hi chhoDna paDta hai ghar mohabbat ka

jise bhi ghar ki zarurat ne mar Dala hai

bahut se log zalalat mein mare jate hain

kisi kisi ko sharafat ne mar Dala hai

waba ye kaisi hai baiThe hain log hath dhare

sabhi ko ek si fursat ne mar Dala hai