shab-e-visal shab-e-intizar aai hai

shab-e-visāl shab-e-intizār aa.ī hai

ḳhizāñ meñ dekhiye kaisī bahār aa.ī hai

hazār ġhuncha-e-gul par bahār aa.ī hai

sabā chaman se magar be-qarār aa.ī hai

kis kī yaad jo ruḳhsat huī mire dil se

sahar udaas to shab sogvār aa.ī hai

hamārī ruuh fanā kī masarratoñ ke liye

qabā-e-tan sar-e-ālam utaar aa.ī hai

ye mai-kashī thī ki parda-darī ki mahfil meñ

kisī kī yaad ba-vaqt-e-ḳhumār aa.ī hai

kahīñ zarūr huā hai chaman meñ qatl-e-tuyūr

lahū kī buuñd ba-dosh-e-ġhubār aa.ī hai

hazār ḳhaam thī phir bhī mirī umiid 'kamal'

shabāb-e-shām-e-tamannā nikhār aa.ī hai

shab-e-visal shab-e-intizar aai hai

KHizan mein dekhiye kaisi bahaar aai hai

hazar ghuncha-e-gul par bahaar aai hai

saba chaman se magar be-qarar aai hai

kis ki yaad jo ruKHsat hui mere dil se

sahar udas to shab sogwar aai hai

hamari ruh fana ki masarraton ke liye

qaba-e-tan sar-e-alam utar aai hai

ye mai-kashi thi ki parda-dari ki mahfil mein

kisi ki yaad ba-waqt-e-KHumar aai hai

kahin zarur hua hai chaman mein qatl-e-tuyur

lahu ki bund ba-dosh-e-ghubar aai hai

hazar KHam thi phir bhi meri umid 'kamal'

shabab-e-sham-e-tamanna nikhaar aai hai