shab ke KHilaf barsar-e-paikar kab hue

shab ke ḳhilāf barsar-e-paikār kab hue

ham log raushnī ke talabgār kab hue

ḳhushbū kī ghaat meñ haiñ shikārī havāoñ ke

jhoñke magar kisī se giraftār kab hue

ta.abīr kī rutoñ ne badan zard kar diye

phir bhī ye log ḳhvāb se bedār kab hue

taale lagā liye haiñ ḳhud apnī zabān par

kyā baat hai tum itne samajhdār kab hue

ye ahd apnī ruuh meñ ahd-e-firāq hai

ham matl.a-e-suḳhan pe numūdār kab hue

ḳhil.at vasūl karte hue sar uThā liyā

rusvā 'najīb' ham sar-e-darbār kab hue

shab ke KHilaf barsar-e-paikar kab hue

hum log raushni ke talabgar kab hue

KHushbu ki ghat mein hain shikari hawaon ke

jhonke magar kisi se giraftar kab hue

tabir ki ruton ne badan zard kar diye

phir bhi ye log KHwab se bedar kab hue

tale laga liye hain KHud apni zaban par

kya baat hai tum itne samajhdar kab hue

ye ahd apni ruh mein ahd-e-firaq hai

hum matla-e-suKHan pe numudar kab hue

KHilat wasul karte hue sar uTha liya

ruswa 'najib' hum sar-e-darbar kab hue