shab ki hairan kar gae mere unT

shab ki hairān kar ga.e mire uuñT

sub.h sahrā se bhar ga.e mire uuñT

ret mahkī to gungunāne lage

chalte chalte Thahar ga.e mire uuñT

jabl-e-tāriq pe dekh kar ghoḌe

pāniyoñ meñ utar ga.e mire uuñT

sajne vaalā thā kumbh kā mela

aa.ina dekh kar ga.e mire uuñT

ḳhushk hoñToñ se mā'zarat kar lī

dil ke sahrā meñ mar ga.e mire uuñT

ret ke is qadar shanāvar the

naḳhl dekhe to Dar ga.e mire uuñT

aur bhī rāste the ghar kī taraf

ret par chal ke ghar ga.e mire uuñT

ek bhī sīdhī kal nahīñ 'ikrām'

apne ajdād par ga.e mire uuñT

shab ki hairan kar gae mere unT

subh sahra se bhar gae mere unT

ret mahki to gungunane lage

chalte chalte Thahar gae mere unT

jabl-e-tariq pe dekh kar ghoDe

paniyon mein utar gae mere unT

sajne wala tha kumbh ka mela

aaina dekh kar gae mere unT

KHushk honTon se ma'zarat kar li

dil ke sahra mein mar gae mere unT

ret ke is qadar shanawar the

naKHl dekhe to Dar gae mere unT

aur bhi raste the ghar ki taraf

ret par chal ke ghar gae mere unT

ek bhi sidhi kal nahin 'ikram'

apne ajdad par gae mere unT